Timuγliwin n yizzayriyen γef uṣenṣeb n tutlayt tamaziγt deg uẓeṭṭa amettan « Fayesbuk ». Tasleḍt n yinaw

Abstract

Tutlayt tamaziγt d yiwet gar tutlayin tinaṣliyin n Tefriqt n ugafa, « Irem ‘tamaziγt’, yettwaseqdac s γur Igrigiyen (barbaros) d irumaniyen. »1 . D tunṣibt seg useggas n 2016 maca ar ass-a mazal ur teṭṭif ara amkan-is irekden am tutlayt taεrabt, ur tettwaselmed ara deg yakk aγiren n tmurt n Lezzayer imi tettuneḥsab d taberranit γer kra n yemdanen. Yal wa d acu n tmuγli i d-yettak fell-as : llan wid yumnen yis llan wid xaṭi, γef waya anadi-nneγ yerza timuγliwin n yemdanen Izzayriyen γef uṣenṣeb n tutlayt tamaziγt deg uẓeṭṭa amettan « fayesbuk». Tatiknulujit d tawil n usnerni n tutlayin imi amaḍal akk yessemras-itt ama deg temdint neγ deg udrar. « Tatiknulujit tettusbadu am akken d tazrawt n yimriwen d tarrayin yettusemrasen deg yifurkayen yemgaraden. »2, amdan yesseqdac tatiknulujit s wudem n tussna, taγuri n yedlisen, aselmed n tutlayin. Tettuneḥsab d tamussni, d tewtilt yettwasemrassen akken ad yaweḍ umdan γer yiswi-is neγ i tifrat n wuguren. Daγen tettaǧǧa amdan ad yili d awḥid γas ma yella akked twacult-is deg yiwen n uxxam maca yesruḥuy yakk lweqt-is deg uẓeṭṭa amettan neγ γer wayen akk icudden γer tiknulujit am fayesbuk, anestagram, tiktuk, d ayen i d-t-yeǧǧan ad yeslali iγeblan ama d tnefsit-is ama d yimawlan-is.