Talsawit deg ungal unti aqbayli, ungal “Icenga n talsa” n Rachida BEN SIDHOUM OULD HOCINE, d amedya. Tasleḍt tasnamkant

Abstract

Tasekla taqbaylit d tin i d-ilulen d timawit, tedder di timawit aṭas n leqrun, inaw deg-s yettruḥu seg yimi γer umeẓẓuγ, imi timawit tella d allal n taywalt ssexdamen-tt yimdanen akken ad mmeslayen gar-asen, ad ssenfalin γef wayen ttidiren d wayen i ten-iceγben, ssenfalin γef tmetti d wazalen-is, dayen i ten-yeǧǧan snulfan-d tiwsatin n tsekla timawit ama d tasrit akka am yinzan d lemεun, timucuha, tumgisin, tiqṣiḍin, ama d tamedyazt i ssexdamen s waṭas imi asefru yella d arfiq n yimdanen di tallit tamensayt, ama d azgaz ama d tameṭṭut, tamedyazt tella d lemri n tmetti s leṣnaf-is yemgaraden. Tasekla taqbaylit γas akken tlul-d d timawit maca ur teqqim ara akka imi tuγal tekcem-d tira, γas akken di tazwara tira tella-d s tutlayt tafransist γef ufus n yimyura i iεarḍen ad d-jemεen ayen yellan neγ ayen i d-teslal timawit imi aḥric ameqqran iruḥ di tatut, aqeddim amezwaru γer ubrid n tira yella-d sγur yimyura yecban Said BOULIFA i yuran Recueil de poesies kabyles di 1904, γer tama-s ad naf imyura-nniḍen yecban Jean AMROUCHE i yuran Les chants berbères et kabylie di 1939 d wetma-s Taous AMROUCHE i yuran Le grain magique di 1966 ugmen-d seg yisefra n yemma-tsen Fadhma ath Mensour Amrouche, yella daγen Mouloud FERAOUN i yuran Les poémes de Si Mohand di 1960, Mouloud MAMMERI yura Poémes kabyles anciens di 1980, imyura-agi γas akken uran s tefransist maca agbur n yidlisen-nsen yella-d γef teqbaylit, yerna ḥarzen tasekla si tatut.