Tasleḍt tasnazmulit n yiwudam deg wungal «Izen yeffer wakal» n Fahim MESΣUDEN

Abstract

Tasekla d tigejdit, d agerruj n yal timetti, tasuta tettak-itt i tayeḍ, tesԑa azal meqqren seg yal tama, ama seg tama n yidles, leԑwayed d wansayen… S yis kan i nezmer ad nẓer amek i yettxemmim ugdud, nezmer ad d-nini d nettat i d lsas swayes i tbedd tγerma. Agdud Amaziγ, am netta am yigduden nniḍen, yekseb tasekla. Tasekla tamaziγt tedder s timawit imi ulac wid i tt-yuran, tiwsatin-is ttruḥunt kan seg yimi γer umeẓẓuγ, akka i tt-id-yesbadu ula d MoussaImarazene yenna: «Tasekla-agi akken ma tella tettruḥu deg yimi γer tmezzuγt» ,Md: Tmedyazt (Amԑeẓber, Tamedyazt n tyemmat) Timucuha, Timseԑraq, Inzan d wayen nniḍen, s yis-sent i tedder tsekla tamaziγt almi d asmi d-kecmen yirumyen γer tmazγa deg tasut tis 19. Iserdasen irumyen qqimen-d i ujmaԑ n tsekla timawit n yimaziγen akken ad issinen axemmem d yidles-nsen ilmend n usishel n temharsa. Ger yimezwura i d-igemren deg temnaḍt n leqbayel d Hanoteau, syin rnan-d wiyaḍ. S unekcum n tira, tasekla tamaziγt tezger asurif-nni n uԑeddi si timawit γer tira n yiḍrisen n timawit, tuγal lulen-t-d deg-s tewsatin timaynutin neγ tatrarin ur nelli ara uqbel am: ungal, amezgun, tullist, tamedyazt yettwarun, tamacahut yettwarun...