Uguren i d-ttmagaren yinelmaden iεerbawalen deg yirmad n tmaziγt

Abstract

Tutlayt tamaziɣt d tutlayt tayemmat n ugdud amaziɣ, yes-s i d-yettbeggin umaziɣ timagit-is. Tutlayt n tmaziɣt tudef ɣer uɣerbez azzayri deg useggas 1995, aselmed-is ur yeqqim ara akken yebda, imi tger asurif ɣer sdat. Abeddel deg unagraw n usegmi i d-yellan deg useggas n 2003, yegla-d s usutteb n kra n wallalen n tsensegmit, ad d-nebder gar-asen ahilen d yidlisfusen i d-iheyya uɣlif n usegmi i kraḍ n yiswiren. Adlisfus n tmaziɣt ɣur-s azal d ameqqran deg usnerni n tmusniwin n unelmad. Ihi asmi tekcem ɣer uɣerbaz i tikkelt tamezwarut deg useggas n 1995. Tuɣal d taɣelnawt deg tmurt n Lezzayer deg useggas n 2003, d tunṣibt seg 07 meɣres 2016. Di taɣult tamsinent, aselmed d ulmad n tutlayin yettemgirid. Deg ulmad, inelmaden ttmagaren-d uguren. Γef waya i yessefk ɣef uselmad ad iwelleh inelmaden-is s usexdem n wallalen isegmisanen d tarrayin n uselmed iwatan. Ulamma xas ɛeddan ugar n 20 n yiseggasen ɣef unekcum n tmaziɣt ɣer uɣerbaz, inelmaden mazal-iten ur ssinen ara ad arun akken ilaq.