Tazrewt i tuccḍiwin n tira ixeddmen yinelmaden n uswir wis kraḍ deg uɣerbaz alemmas

Abstract

Tutlayt d tulmist tagejdant i yessemgirden amdan ɣef yimuddiren-nniḍen, d allal n teywalt i d-ibennun assaɣen gar yimdanen, yes-s i d-ssenfalayen ayen yellan deg tidmi-nsen, iḥulfan, tiktiwin d tmussniwin-nsen. Yal tutlayt ad tt-naf terfed agerruj n yiwet n tmetti: teskanay-d amezruy-is, tamagit-is tanmettit d tdelsant. Tamaziɣt d tutlayt tanaṣlit n yimezdaɣ n Tefriqt Ugafa, tebḍa ɣef waṭas n tantaliwin gar-asent: tamẓabit, tacawit, tatargit, taqbaylit d tiyaḍ, tedder s timawit acḥal tasuta maca ur tengir ara. Γef waya inagmayen d yimussnilsen fkan-as azal i tuklal gan-as-d abrid ɣer tirawit am Saԑid Bulifa d Mulud Mԑemri i ixedmen adlis deg useggas n 1990, deg-s i d-yessumer i tikkelt tamezwarut agemmay i tutlayt tamaziɣt d yilugan n tira-s. Syin akin deg useggas n 1995 tudef tutlayt n tmaziɣt ɣer yiɣerbazen, deg useggas n 2002 tuɣal d tutlayt taɣelnawt, ma deg useggas n 2016 tuɣal d tunṣibt deg tmendawt. Aselmed n tutlayt tamaziɣt deg tmurt n Lezzayer, seg wasmi i yekcem ɣer unagraw n usegmi seg 1995 ar ass-a, deg tazwara imuger-d aṭas n wuguren gar-asen: lixṣaṣ n ttawilat n usegmi; idlisen iɣurbizen, imahilen unṣiben d yiselmaden yesεan tirmit deg taɣult-a, syin tebda tettseggim s talellet n usqamu unnig n timmuzɣa HCA