Tasleḍt n yimebdi n wungal Tagrest Urɣu n Ɛmer Mezdad.

Abstract

Tasekla taqbaylit, tlul-d deg yirebbi n timawit. Imi seg zik, timetti taqbaylit tesselɣuy tamussni-is, imenzayen, d umezruy-is s ubrid n tmucuha, isefra, inzan ... yettwannan s yimi. Timawit tesɛa azal meqqren deg yidles aqbayli, imi leqbayel seg zik fkan azal i wawal, akken i as-yenna ccix Muḥend U Lḥusin: “ Imi taqbaylit tettnawal, rray deg-s yettlal, ihi egt-as nnuba i wawal”. Akken almi d tallit n temhersa i tebda tsekla tamaziɣt tettaɣ abrid n tira. Di tallit-a i bdan ttbanen-d yimura yettarun s teqbalyit am: Ssaɛid Bulifa, Belɛid At-Ɛli, Meẓyan u Muḥ ... Imrabḍen irumyen sbeɣsen aṭas Belɛid At-Ɛli akken ad yaru s teqbaylit. Aɛeddi-a seg timawit ɣer tira, yegla-d s tlalit n kra n tewsatin tiseklanin timaynutin ɣer tsekla taqbaylit, gar-asent ungal. Ungal aqbayli mačči kan d tawsit n tsekla, maca d ttawil i d-yeskanen asuter d umennuɣ ɣef tmagit d tutlayt n tmaziɣt, d wayen tettidir tmetti di tallit-nni. Tira n wungal d allal n yimenɣi d usuter n tutlayt tamaziɣt. Gar yimyura imenza i ineǧǧren abrid n tira n wungal aqbayli, ad naf Ɛmer Mezdad. Ɛmer Mezdad ɣas ma yelmed tasnajya, maca yeḍfer abrid n tira s tutlayt tamaziɣt (taqbaylit). Seg useggas n 1990 ɣer useggas n 2023, yessuffeɣ-d azal n 11 n yidlisen gar wungalen, tullisin d yisefra. Ungal-is amezwaru i d-yessuffeɣ iḍ d wass deg useggas n 1990, sakin iɛawed-as asuffeɣ deg 2010. Sakin yessuffeɣ-d ungal tagrest urɣu, deg useggas n 2000. D ungal iwumi ara neg tasleḍt deg tezrawt-nneɣ. Ɛmer Mezdad, ijebbed imeɣra s tira-is yufraren, isental-is i d-yettawin ɣef tlufa n tudert n yal ass d usemres n tutlayt timserreḥt i yezmer ad yegzu yimeɣri s sshala.