Tasenmettit timsezɣent di tmacahut Deg temnaḍt n At Ɛisi

Abstract

Yal taɣerma deg umaḍal tesɛa tasekla seg-sent tasekla n ugdud amaziɣ , tuɣ sin n yiberdan , tasekla tamensayt i d-yellan s wudem n timawit , tayeḍ s tirawit. Tasekla tamensayt telḥa-d seg yimi ɣer umezzuɣ wa yettakk-itt i wa , d tamesbaɣurt ṭṭuqtent tewsatin tekseb ,tamacahut d yiwet n tewsit seg tewsatin n tesrit di tsekla-agi i d-yufraren dayen i ɣef d-tura Camille Lacoste Dujardin : “gar akk ayen yerzan tasekla timawit n tmurt n lezzayer d tmazɣa,amur ameqqran yettunefk i tmucuha n tmurt n leqbayel”1 Ayen ad negzu seg wayen d-tura tnagmayt-agi tamacahut taqbaylit tuɣ adeg wessiεen di tmurt umaziɣ , imi azal-nsent d twuri-nsent meqqret di tmetti imi isental-is d lmaεna awalen-is d temsal i d-tettawi , trennu lefhama d tmussni i wemdan.Ǧellawi yura-d ɣef wanect-a: “ Ma nuɣal-d ɣer tmurt n leqbayel , ad naf șșenf-agi n tsekla timawit inuda yal tamnaḍt, yeṭṭef tasga s tehri di tmetti n wemdan aqbayli”2 Ihi Tamacahut teṭṭef tasga , ggan-as ccan d wazal ,imi yella deg-s ayen yestahlen ad tufrar akka ,ɣef waya ad d-naf wid yessnernan tawsit-agi si timawit ɣer tirawit,aṭas n yinagmayen d yemyura ama di tmurt n lzzayer neɣ d iberraniyen , rran lwelha-nsen s wudem alqayan ɣer șșenf-agi n tesrit , yal yiwen d acu id-yewwi .llanwid ten-id-ijemεen , llan wid wid id -yefkan tamuɣli-is fell-asent , llan wid id-yernan tiktiwin fell-asent di tezrewt-is . 1