Iferdisen n usgunfu deg wungal aqbayli “Icenga n talsa” n Rachida BEN SIDHOUM OULD HOCINE, d amedya

Abstract

Agdud aqbayli neɣ amaziɣ s umata am netta am yegduden nniḍen yal wa s tsekla-ines , tasekla taqbaylit telḥa-d aṭas n talliyin s wallal n timawit i tt-yeğǧan ad tidir almi d talit tamirant, mi id yebda leqarn wis 19 tebda tsekla tettidir tallit nniḍen, tallit n tira tettwasen s leqdicat i xedmen yimrabḍen irumiyen, deg useggas n 1904 (Si Σmar usaɛid Bulifa) issuffeγ-d adlis-ines « poesie kabyle »Almi d aseggas n 1919 ulac win yarnan yura-d kra. Deg useggas n 1940 (Belɛid At Σli ) ibeddel abrid n tsekla taqbaylit tirawt s wammud n tmucuha d tullisin d yisefra d-yeffγen deg yiseggasen n 1963 di FDB s yisem n « les cahiers de Belaid ou la kabylie d‟Antan ». Qqaren-as ababat n tsekla taqbaylit yura daγen ullis « Lwali n wdrar » icuban tawsit n wungal akken i d-tessegza PERNET Galand : « Nezmer ad d-nini d Belɛid At Ɛli i d amezwaru i yuran deg tewsit-a tanaggalt di tsekla taqbaylit »1. Tasekla taqbaylit tebḍa ɣef snat :tasekla tamensayt (ayen akk ixeddmen imezwura) , d tsekla tatrart, d ayen i d-ibanen ilmend n wayen uran imyura d yimeskar. Tasekla taqbaylit tamensayt ṭṭuqtent deg-s tewsatin am tmucuha, inzan, lemɛun, timsaɛraq, tumqissin, tiqsiḍin, d tmedyazt s lesnaf-is yimgaraden sɛant azal meqqren deg tmetti taqbaylit. Iben Kheldoun yenna-d : « Limer jerden yimaziɣen ayan akk ḥekkun seg tmucuha, tiqsiḍin, inzan d lemɛun d temsaɛraq tili ččuren idlisen ». 2 Akken ad seḥbibren ɣef tsekla-a ur tettɣimi ara kan d awal, ak