Asentel : tasledt tasentalant n wungal tawkilt tamcumt n Racid Tighilt

Abstract

Tasekla tamaziɣt, seg timawit ɣer tira telḥa-d isurrifen ɣezzifit deg ubrid n unerni d usnulfu, d aya i tt-yerran ad tessihrew tilisa-s, i wakken ara d taɣ amkan gar tsekliwin n tutlayin nniḍen. Tutlayt tamaziɣt i d-yuɣen aẓar seg talliyin tiqburin n uzermezruy, yerra ula d tasekla tedda deg ubrid n unerni ilmend n umezruy d unamek n tudert n yimdanen. Deg tallit taqburt, d tin yellan d timawit kan s tewsatin i wumi nessawal tiwsatin timensayin, tiɣerfanin n tsekla,deg umedya: timseεraq, isefra, timucuha, izlan,...Deg tallit-nni tiwsatin-a d tid yettruḥun gar yimdanen seg yiles ɣer tmeẓẓuɣt s ttawil n ccfawa d uḥfaḍ, i wakken ara d-qqiment i tsutiwin. Gar tewsatin i d-yegran ar ass-a: tamedyazt, deg umedya isefra n Si Muḥend Umḥend, izlan n tlawin, timucuha d tbuɣarin ɣer yimɣaren d temɣarin... Akka i d-telḥa tsekla tamaziɣt deg ubrid n timawit,almi d tallit n umnekcam afransis ɣer tmurt n tmazɣa, i tebda tettaẓ ɣer unnar n tira. Gar yimezwura i yerran lwelha-nsen ɣer tira n tsekla timawit taqbaylit, d kra n yiserdasen irumiyen, ladɣa asmi i d-mlalen ugur n unamek n tuddsa tanmettit n tmurt n Leqbayel, ayen i d-asen-d-yezgan d aεewwiq deg ubrid n temhersa n temnaḍt n Leqbayel.