Tismidegt n temnaḍt n Buderbala Tazrawt tasnalɣamkant

Abstract

Akken i d-nnan Yinmazrayen, Tafriqt n Ugafa d tamurt n Yimaziɣen; tutlayt-nsen d tamaziɣt. Maca aṭas n yiɣerfan i d-ikecmen ɣur-s, yal aɣref yegla-d s tutlayt-is, ta d tamentilt n tilin n waṭas n tutlayin deg Tefriqt n Ugafa, d anect-a i yeǧǧan Imaziɣen sqedcen tutlayin-nniḍen am tbuniqit d tlatinit. Ulamma tutlayin-a ɣur-sent azerrer ɣef tmaziɣt, maca anect-a ur d-yegli ara s jellu-ines, imi Imaziɣen ḥerzen-tt. Deg tasut tis (7) bdan ttmeslayen taɛrabt i d-wwin Yinselmen, s wakka yebda useɛreb n Tefriqt n Ugafa, ma yella d tamaziɣt tettenqas kra kra alammi i d-tegra deg kra n temnaḍin kan. Гas Imezdaɣ n Tefriqt n Ugafa ttwaɛerben, maca ḥerzen iferdisen n tumast-nsen yettuneḥsaben d anadday n yidles-nsen amaziɣ am: tenfaliyin tukrifin, ansayen, timucuha tiqburin, umyiten, ismawen n yimɣan d yismidgen; ineggura-ya (ismidgen) sɛan azal d ameqqran deg uḥraz n tumast n ugdud d umezruy-is, sɛan azal daɣen deg uḥraz n tutlayt taqburt.